Bol ik taare jhan jhan jhan jhan

 

Bol ik_taare jhan jhan jhan jhan 

kahkashaan hai meri sumran  

shaam ki surkhi mera kundan 

noor ka tadka meri chilman 

tod chuka hoon saare bandhan 

poorab pachham uttar dakkhhan 

bol ik_taare jhan jhan jhan jhan 

  

 

mere tan mein gulshan sabke  

mere man mein joban sabke 

mere ghat mein saachan sabke 

meri surat darshan sabke 

sabki surat mera darshan 

bol ik_taare jhan jhan jhan jhan 

  

 

sabki jholi meri jholi 

sabki toli meri toli 

sabki holi meri holi 

sabki boli meri boli 

sabka jeewan mera jeewan 

bol ik_taare jhan jhan jhan jhan 

 

  

 

sabke kaajal mere paare 

sabki aankhen mere taare 

sabki saanse meri dhaare 

saare insaan mere pyaare 

saari dharti mera aangan 

bol ik_taare jhan jhan jhan jhan